(مش مصنف) بقلم الشاعر وحيد راغب
بالفصيح مانيش مُسَيَّس
أو مدبلَج ف الجماعة
خطِّى ركعة أو مِقَولَب
نسخ جايز
كوفى جايز مش عنان
أو أوباما
ضحكتى من قلب نفسى
صافية زى سحابة خضرة
مش غيامة
أمتطى فى الريح جيادى
بعد تمهيدها لسباقى
وانجذب للحال بوجدى
واغترف من كل ساقى
للحقيقة أبعاد كتيرة
كل منا له شطيرة
طعمها ف الثغر شتى
واحتكارها
كذب خالص
خلا فينا الصدق عيرة
مش مصنف زى ميسى
أو مهند
أو معرَّف بالعشيرة
طير ما يعرف غير نشيده
ف كون وسيع
يشترى م الكل .. يحلم
مش يبيع
الغصون مأواه وعشه
والفضا
لحنه اللى ساكن
ف الربيع
يشرب اللبن المخثر
واللى رايب
واللى محلوب منذ ساعة
يرشف الزهرة اللى فاحت
بالعبير
يقطن القصر المنضد
أوكوخ صُغَيَّر ع الشطوط
لقمته كعك وفطاير
أو خبز ناشف
بالزيوت
يعترف بالخلق خلقه
والمعاملة
اعتقد ماشئت واعرف
يوم حسابك
خالى من
لعب ومجاملة
بالفصيح ماليش مصالح
غير صهيل يقلق منام
عقل قلبى مش مُشَتَّت
طَارْحُه طازة.. وروحه ماسكة
ف اللجام
أحترم صوتك والبِّى
فهم مسنود بالدلائل
وافرز الحرف المجعَّد
م الخمائل
لست ضدك أو معاك
انت جن أو ملاك
بس سرجى شمس ماليِة
بضوءها ذاتى
تنسف الضلمة وتعزف
لحن منزوع الشتات
بالفصيح باحلم ف بكرة
يكون سعادة
للى ساكن جوا شقَّة
واللى ساكن ع السطوح
ليست هناك تعليقات:
إرسال تعليق